JANNAT HASIL KARNE K AASAN TARIQEY

“CONFIRM HAI! Aankh band kar k 3 baar bolo MOHAMMAD aur 9 logon ko send karo.Aaj aik khushkhabri mile gi.MUHAMMAD ki qasam hai send karo aur intizar karo raat ka aur agar send na kiya to 12 saal tak un lucky ho jaoge”

“Ramzan ka mahina shuru ho chukka Huzoor Pak (S.A.W.W) ka farman hai k jo sab se pehly iss mahine ki khushkhabri dey ga uss per jannat wajib ho jaye gi”

---

Iss tarha k messages to zarur apko aaty hongey??Jin ko bhejne wale aisa mehsoos hota hai jese shayad Islam k thaiky daar hon.Meri  bohat se logon se aksar inn baton per kafi behas bhi ho chuki hai k mujhe aise messages forward na kiya karen kyun k iss tarha karne se na sirf hum khud gunah gaar hoty hain bal k aik gunah ko barhawa dainy aur phailany ka bhi bais banty hain.Pichly ramzan ki baat hai k chand logon ki taraf se mujhe messages mily jin ka Khulasa ye tha k..

“Agar aap Jummat-ul-widda ko itne nawafil adda karen to apki pichli sari qaza namazen maaf hojaingi”

Jin se meri bohat behas hui k Quran ya Hadees main kahan ye baat likhi hai?Thek hai k Islam main aasanian rakhi rakhi gayi hain magar iss qadar bhi nahi..Agar aisa hota to phir sab log poora saal namaz na parhty aur her saal Jummat-ul-widda ko qazza namazen maaf karwa laity.Jawab main unka kehna tha k mujhe to ye message aaya maine tumhe bhej diya.

Mujhe bohat afsos hota hai k hamari qaum ko jis bhi raah per lagaya jaye wo aasani se lag jati hai.Kuch arsey pehly  kisi tv channel per aik Aalim-E-Deen ny bhi fatwa diya tha k iss tarha k sms forward karna sakht gunah hai.

"Aisa Islami Msg jin me Qasam di jae. ye kaha jae k ye Msg karo gy to Achi khaber mile  gi,Werna unlicky raho gy Aise Msg KRNA Gunah-e-kabira hai.jo Msg Fwd ho chuky hen,un per Tubba krni chahye,Aur Ainda aisa na kisa Jae"(Mufti Akmal SB. Q.Tv)

Magar afsos k sath kehna par raha hai k phir bhi logon ny iss tarha k messages bhaijna tark nahi kiye.chahe khud eid k eid hi kyun na namaz parhty hon magar messages k zariye Islam ki tableegh iss trha kar rahe hoty hain jaise khuda na khuwasta Walli-Ullah hon aur aisa kar k jihad kar rahe hon.Iss tarha k messages bhaij kar k hum apne sath sath dosron ko bhi gunah main daalty hain.Iss k ilawa bhi logon ny ab mukhtalif tariqey dhoond liye hain maslan iss tarha k messages aaty hain k..

“Aaj hum  Huzoor Pak (S.A.W.W) ko  1 laakh Darood Pak ka tohfa paish karengy.plz aik baar muhabbat se Darood Pak parh kar aagy forward kar dyn.Hum faltu messages to bohat forward kartey hain magar aise messages delete kar dety hain agar sachey musalman ho to aagey forward karo”

Sath sath hamen hamare na karda gunahon ka ehsas dilane aur sharminda kar k acha musalman banana ki bhi koshish ki jati hai k “Allah fermata hai k agar tum logon k samne mujhe rad karogy to main apney samney tumhen rad kar dunga”

Arey bhae ab koi aisey messages banana walon se poochey k aakhir ye Islam ki konsi shakal hai??k kisi ko zabardasti sawab dilwa rahe hain..jab k Islam main to zabardasti ka tassawur hi nahi hai.Agar aap itne hi muqaddas aur noorani ban’na chah rahe hain to bhai ap khud kyun nahi baith kar 1 laakh martaba Darood sharif parh laity??

Ab aik naya tren bhi sms market main mutaarif hua hai k koi bhi apna Quote Hazrat Ali(R.A) ya kisi bhi muqaddas hasti k naam k sath mansoob kar k forward kar dyta hai ya phr kisi Soorat ya Aayat ka tarjuma safha aur Paara number k sath bhaij diya jata hai.Aur aksar oqat jab Quran pak khol kar daikha jaye to sab bilkul ulat ya ghalat hota hai.Iss se bari hamari bad bakhti bhala aur kya hogi k hum akhlaqi tor pr itni pasti ka shikaar ho chuky hain k bina kisi tasdeeq k aise messages forward kar dyty hain.

Main aise messages k takhleeq kaaron aur wo log jo aise messages aagy bhaijty hain unse ye sawal poochna chahti hoon k inn mobile phones se pehly Islam kaise phail raha tha??? Kya hamara emaan iss qadar kamzor ho chukka hai k hum iss tarha ki baton per ehtaqad rakhne lage hain??? Ye Islam dushmano ki aik bohat bari saazish hai aur hamari na samajh qaum bina sauce samjhy sawab kamane k chakkar main un ki madad kar rahi hai.Khudara hosh k nakhun lain aur iss qisam k 3^rd class tariqon se Islam phailane ki koshish band kar dyn au raise messages parhty hi delete kar dyn warna Allah k azaab se shayad hamen koi na bacha sakey.